Allar færslur eftir Aldís Arnardóttir

Móttaka í Listasafni Reykjavíkur

Sæl öll,
Næstkomandi mánudag, 28. maí býður Listasafn Reykjavíkur félagsmönnum í Listfræðafélagi Íslands til móttöku í Hafnarhúsi vegna fundar NORDIK í Reykjavík.

Boðið stendur frá kl. 18-19.

Mætið tímanlega

Öll hjartanlega velkomin

Vinsamlega staðfestið komu ykkar með því að senda tölvupóst til listfræðafélagsins, stjorn@listfraedi.is

Bestu kveðjur
Ynda Gestsson formanneskja

Aðalfundur Listfræðafélagsins 8. maí n.k 🗓

Aðalfundur Listfræðafélags Íslands verður haldinn þriðjudaginn 8. maí 2018 kl. 17 í húsnæði SÍM, Hafnarstræti 16, 101 Reykjavík.

Dagskrá aðalfundar er svohljóðandi (í samræmi við lög félagsins):

  1. Kosning fundarstjóra.
  2.  Ársskýrsla stjórnar kynnt af formanni og lögð fram til samþykktar.
  3.  Endurskoðaðir ársreikningar félagsins kynntir og lagðir fram til samþykktar.
  4. (. Lagabreytingar.)
  5.  Kjör stjórnar. Kjör tveggja endurskoðenda reikninga.
  6.  Ákvörðun árgjalds fyrir næsta starfsár.
  7.  Önnur mál.

Um lið 4.
Engar tillögur að lagabreytingum liggja fyrir þannig að sá liður fellur niður.

Stjórn félagsins er skipuð formanni, gjaldkera, ritara og tveimur varamönnum. Við viljum hvetja þá félaga sem vilja starfa undir merkjum félagsins og láta gott af sér leiða að bjóða sig fram til stjórnarsetu. Gott væri að vita um slík framboð fyrir fundinn og hvetjum við áhugasama til að hafa samband við stjórn (stjorn@listfraedi.is).

Þeir sem vilja vinna að einhverjum sérstökum málefnum innan félagsins eru einnig hvattir til að hafa samband við stjórnina fyrir fundinn.

Við hvetjum alla félaga til að taka virkan þátt í mótun starfs félagsins og mæta á aðalfund. Að loknum fundi verður boðið upp á léttar veitingar.

Ynda Gestsson, formanneskja
Aldís Arnardóttir, ritari
Baldvina Sigrún Sverrisdóttir, gjaldkeri
Aðalheiður Valgeirsdóttir, varamaður
Jóhannes Dagsson, varamaður

Bróderað landslag 🗓

Harpa Björnsdóttir flytur fyrirlesturinn „Bróderað landslag“ á vegum Listfræðafélags Íslands miðvikudaginn 2. maí kl. 12 í Safnahúsinu við Hverfisgötu.

Í erindi sínu mun Harpa fjalla um sérkennileg myndverk frá árunum 1914-1956, þar sem himinn og vatn er málað en landslag saumað út með listsaumi. Verkin kallast á við þá landslagsdýrkun sem kom fram hjá íslenskum listmálurum á sama tíma og tengist sjálfstæðisbaráttu og styrkingu á sjálfsmynd þjóðar sem rís á þessum árum til fullveldis og síðar til fulls sjálfstæðis. Sýning á nokkrum slíkum verkum opnar í Safnasafninu um miðjan maí.

Harpa Björnsdóttir stundaði nám við Myndlista- og handíðaskóla Íslands, Háskóla Íslands, Leiðsögumannaskóla Íslands og var gestanemandi við listaskóla í Kaupmannahöfn og Dublin. Hún hefur starfað sem myndlistarmaður frá árinu 1983, var verkefnastjóri Menningarnætur í Reykjavík 1997 og 1998 og framkvæmdastjóri Listahátíðar í Reykjavík 1999-2000. Harpa hefur einnig verið sýningarstjóri fjölmargra sýninga.

Harpa hefur unnið að rannsókn og útgáfu bókar um Karl Einarsson Dunganon í samstarfi við Helgu Hjörvar, bókin mun koma út samhliða yfirlitssýningu á verkum hans í Listasafni Íslands í haust. Undanfarin ár hefur Harpa unnið að rannsókn á lífi og myndlist Sölva Helgasonar (1820-1895) og stefnir að útgáfu bókar á 200 ára ártíð hans árið 2020.

Aðalfundur Listfræðafélagsins 8. maí n.k 🗓

Stjórn Listfræðafélags Íslands boðar til aðalfundar þriðjudaginn 8. maí 2018 kl. 17.00 í húsnæði SÍM, Hafnarstræti 16, 101 Reykjavík.

Dagskrá aðalfundar verður auglýst nánar þegar nær dregur.

Félagsmenn eru hvattir til að gefa kost á sér til setu í stjórn félagsins þar sem fyrir liggur að hluti núvernandi stjórnar gefur ekki kost á sér til áframhaldandi stjórnarsetu.

Þeir sem vilja vinna að einhverjum sérstökum málefnum innan félagsins eru einnig hvattir til að hafa samband við stjórnina fyrir fundinn.

Að loknum aðalfundi verður boðið er upp á léttar veitingar.

Við hvetjum alla félaga til að taka virkan þátt í mótun starfs félagsins og mæta á aðalfund.

Magnús Gestsson, formanneskja

Aldís Arnardóttir, ritari

Baldvina S. Sverrisdóttir, gjaldkeri

Aðalheiður Valgeirsdóttir, varamaður

Jóhannes Dagsson, varamaður

Um afdrif listfræðinnar í hugmyndaheimi nútímans 🗓

Gunnar J. Árnason listheimspekingur flytur fyrirlesturinn „Um afdrif listfræðinnar í hugmyndaheimi nútímans“ á vegum Listfræðafélags Íslands miðvikudaginn 4. apríl kl. 12 í Safnahúsinu við Hverfisgötu.

Gunnar er höfundur bókarinnar Ásýnd heimsins, um listir og fagurfræði í hugmyndaheimi nútímans. Í henni er fjallað hvernig listir og fagurfræði hafa haft áhrif á margar af þeim heimspekilegu hugmyndum sem gegndu stóru hlutverki í að skapa hugmyndaheim nútímans frá átjándu öld til loka tuttugustu aldar. Í erindi sínu mun Gunnar ræða um listfræði, listasögu og listgagnrýni, í ljósi þessarar sögu og velta fyrir sér þeirri spurningu hver staða listfræði er í hugmyndaheimi nútímans og hvaða erindi hún á við samtímann. Hvað ætlar hún sér með listina, hvað ætlar hún sér með okkur?

Gunnar J. Árnason hefur skrifað um myndlist um árabil og verið stundakennari við Listaháskóla Íslands. Hann lærði myndlist í Myndlista- og handíðaskóla Íslands og School of Visual Arts í New York áður en hann sneri sér að heimspeki við Háskóla Íslands og listheimspeki og fagurfræði við Cambridge háskóla á Englandi.

Ásýnd heimsins, um list og fagurfræði í hugmyndaheimi nútímans, kom út á vegum Listaháskóla Íslands og Háskólaútgáfunnar árið 2017.

Menning í Múlakoti. Gróðrastöð lista á fyrri hluta 20. aldar 🗓

Ásta Friðriksdóttir listfræðingur flytur fyrirlesturinn Menning í Múlakoti: Gróðrastöð lista á fyrri hluta 20. aldar, í Safnahúsinu við Hverfisgötu miðvikudaginn 7. mars milli kl. 12 – 13.

Bærinn Múlakot í Fljótshlíð var mikil menningarmiðstöð á fyrri hluta 20. aldar og bærinn tengist íslenskri listasögu en þangað lögðu margir af fremstu listamönnum þjóðarinnar leið sína og dvöldu um lengri eða skemmri tíma. Hjónin Túbal Magnússon og Guðbjörg Þorleifsdóttir ráku gistiheimili og veitingastað í Múlakoti og síðar tók sonur þeirra, myndlistarmaðurinn Ólafur Túbal við starfseminni. Meðal þeirra listamanna sem dvöldu í Múlakoti má nefna Ásgrím Jónsson, Jón Engilberts og Gunnlaug Scheving.

Ásta Friðriksdóttir útskrifaðist sem listfræðingur frá Háskóla Íslands árið 2016 en hluta námsins var hún skiptinemi við University of Sussex í Brighton í Englandi. Lokaritgerð hennar fjallar um gistiheimilið Múlakot í Fljótshlíð.
Ásta hefur starfað á Listasafni Íslands við skráningu í gagnagrunn Sarps og við fræðsludeild safnsins frá árinu 2015, auk þess að taka að sér leiðsagnir innlendra og erlendra gesta safnins.

Ljósm. Árni Sæberg

Félagsfundur þriðjudaginn 20. febrúar kl. 17

Ágætu félagsmenn Listfræðafélagsins,

Næsti félagsfundur Listfræðafélagsins verður haldinn í SÍM húsinu, Hafnarstræti 16, þriðjudaginn 20. febrúar, klukkan 17 – 19.

Gestur fundarins er Harpa Þórsdóttir safnstjóri Listasafns Íslands.

Í ár eru Íslensku myndlistarverðlaunin veitt í fyrsta sinn, þau eru veitt íslenskum myndlistarmanni sem þykir hafa skarað framúr á síðastliðnu ári. Dr. Magnús Gestsson, fulltrúi Listfræðafélagsins í dómnefnd, mun segja stuttlega frá fyrirkomulagi verðlaunanna.

Við vonum að sem flestir sjái sér fært að mæta á fundinn á þriðjudag og spjalla um málefni líðandi stundar yfir léttum veitingum.

 

Með góðum kveðjum,

Stjórnin

Ávísun um uppdrátta- og málaralistina 🗓

Gunnar Harðarson, prófessor við Sagfnræði og heimspekideild Háskóla Íslands, ræðir um útgáfu sína á riti Helga Sigurðssonar, Ávísun um uppdrátta- og málaralistina, miðvikudaginn 7. febrúar kl. 12 á vegum Listfræðafélag Íslands í Safnahúsinu við Hverfisgötu.

 Ávísun um uppdrátta- og málaralistina er eina íslenska ritið frá fyrri öldum sem fjallar um myndlist á fræðilegan máta. Ritið var hugsað sem kennslubók í málaralist og teikningu sem höfundur skrifaði meðan hann var við nám í Kaupmannahöfn árið 1846. Megin viðfangsefnið er fjarvíddarteikning en einnig er fjallað um listmálun og gildi og gagnsemi myndlistar. Ritið er merkileg heimild um íslenska myndlistarsögu og kom út hjá Crymogeu á síðasta ári. Það hefur ekki áður verið gefið út í heild sinni.

Gunnar Harðarson lauk doktorsprófi við Université Paris I – Panthéon-Sorbonne árið 1984 og er nú prófessor við Sagnfræði og heimspekideild Háskóla Íslands. Hann hefur gefið út bækur og sinnt rannsóknum og kennslu um árabil m.a. við Listaháskóla Íslands.

Miðill-efni-merking: Leiðangur að list Önnu Líndal

„Miðill – Efni – Merking: Leiðangur að list Önnu Líndal “ er heiti fyrirlestrar Ólafar K. Sigurðardóttur safnstjóra Listasafns Reykjavíkur, sem fer fram í Safnahúsinu við Hverfisgötu, miðvikudaginn 6. desember kl. 12. Ólöf er sýningarstjóri yfirlitssýningarinnar Leiðangur á verkum Önnu Líndal, sem nú stendur yfir í Listasafni Reykjavíkur á Kjarvalsstöðum.

Anna Líndal á að baki tæplega þrjátíu ára myndlistarferil og er sýningunni á Kjarvalsstöðum ætlað að greina feril hennar, innra samhengi verkanna og vísanir til samfélagslegra viðfangsefna. Ólöf mun fjalla um aðdraganda og markmið sýningarinnar og rekja hvernig Anna hefur notað ólíka miðla til að til að nálgast viðfangsefni sín þar sem sjónræn framsetning, viðfangsefni og merking haldast í hendur. Ólöf er safnstjóri Listasafns Reykjavíkur og var áður forstöðumaður Hafnarborgar. Hún stýrði um árabil fræðsludeild Listasafns Reykjavíkur þar sem hún hafði m.a. umsjón með málþingum og fyrirlestrum. Ólöf hefur stýrt fjölda sýninga, ritað greinar og haft umsjón með útgáfum um íslenska myndlist.

 

Yfirskrift fyrirlestrarraðarinnar sem Listfræðafélagið stendur fyrir í samvinnu við Safnahúsið nú í haust er Miðill – Efni – Merking. Velt verður upp þverfaglegum spurningum um listhugtakið, miðlun myndlistar, og hvaða merkingu hún hefur á tímum þegar málverk getur verð meira en litur á tvívíðum fleti og hópar sem hafa verið á jöðrum listasögunnar sækja að miðjunni.

Persónusaga – Þjóðarsaga?

Listasafn Reykjavíkur efnir til ráðstefnu á Kjarvalsstöðum þann16. nóvember um einstaklingssöfn í opinberri vörslu undir yfirskriftinni Persónusaga – Þjóðarsaga?

Á ráðstefnunni verður rædd staða einkasafna sem hluta af íslenskri safnaflóru. Tilgangurinn er meðal annars sá að greina hvaða starfsemi er í kringum slík söfn, hvernig þeim er haldið lifandi og hvort að þau styrki eða skekki safneignir einstakra safna og hvaða áhrif tilvist þeirra hefur á listasöguna.

Ráðstefnan er haldin í samstarfi við Rannsóknarsetur í safnafræðum og flytja fulltrúar frá mörgum af helstu listasöfnum landsins erindi. Flutt verða erindi um tilvist slíkra safna utan höfuðborgarsvæðisins og um það hvernig einstaklingar takast á við það hlutverk að eignast arfleið listamanns sem getur talist þjóðarafur. Aðalfyrirlestur flytur Onita Wass safnstjóri Millesgården í Stokkhólmi sem er einstaklingssafn myndhöggvarans Carl Milles (1875-1955) eins lærimeistara Ásmundar Sveinssonar.

Skráning HÉR
DAGSKRÁ:

Ólöf Kristín Sigurðardóttir safnstjóri – Listasafn Reykjavíkur
Opnunarávarp

Onita Wass safnstjóri – Millesgården, Stokkhólmi
Millesgården an artist home from the 1900´s into the 20th century

Sigurður Trausti Traustason deildarstjóri safneignar og rannsókna – Listasafn Reykjavíkur
Einstaklingssöfn innan Listasafns Reykjavíkur í fortíð, nútíð og framtíð

HÁDEGISHLÉ

Sigurjón Baldur Hafsteinsson prófessor – Rannsóknarsetur í safnafræðum
Safnafræði um einkasöfn og hið opinbera

Sigríður Melrós Ólafsdóttir safnstjóri – Listasafn Einars Jónssonar
Hnitbjörg falinn fjársjóður?

Kristín Dagmar Jóhannesdóttir safnstjóri – Gerðarsafn – Listasafn Kópavogs

Listasafn Íslands

KAFFIHLÉ

Halla Hauksdóttir stjórnarformaður – Listaverkasafn Valtýs Péturssonar
Að sitja uppi með fjársjóð

Hanna Dís Whitehead – Listasafn Svavars Guðnasonar

UMRÆÐUR, RÁÐSTEFNUSLIT OG LÉTTAR VEITINGAR