Efni / Resources

Málþing í Listasafni Reykjavíkur, Hafnarhúsi við Tryggvagötu, miðvikudaginn 14. apríl kl. 17.00 til 19.00

Málþing Listfræðafélagsins í Listasafni Íslands 17. mars.
Myndlistarrannsóknir á skilum fræða og myndlistar

Málþingið í Listasafni Íslands var fyrsti viðburður sem hið nýstofnaða félag efndi til. Listasafn Íslands hýsti samkomuna og áætlað er að um eitt hundrað manns hafi sótt þingið. Formaður félagsins, Aðalheiður L. Guðmundsdóttir, flutti ávarp í upphafi og kynnti félagið. Málþingið var það fyrsta í röð málþinga sem félagið stendur fyrir á næstu vikum. Fimm frummælendur voru með erindi.
Dr. Halldór Björn Runólfsson, safnstjóri Listasafns Íslands, sagði frá doktorsverkefni sínu sem hann varði frá Sorbonne háskóla í París, sem fjallaði um vídeólistakonuna Steinunni Vasulka og samstarf hennar við Woody Vasulka (öðru nafni Tímóteus Pétursson). Halldór rekur í ritgerðinni ýmis líkindi milli verka Vasulka hjónanna og hugmynda franska heimspekingsins Jacques Derrida.
Auður A. Ólafsdóttir, lektor í listfræði við Háskóla Íslands, sagði frá listfræðináminu sem þar er í boði, og samstarfi við Listaháskóla Íslands, tilurð þess, skipulag og hugmyndafræðina á bak við námið.
Hlynur Helgason, myndlistarmaður er að vinna að doktorsritgerð í listheimspeki og hann ræddi tengslin og samlíkinguna milli myndlistar og fagurfræði, en hugmyndir sínar byggir hann á verkum franska heimspekingsins Gilles Deleuze.
Þóra Kristjánsdóttir, listfræðingur á Þjóðminjasafni Íslands, gaf dæmi um rannsóknir í listfræði, og hvernig nýjar uppgötvanir leynast víða. Nefndi hún sem dæmi rannsóknir sínar á predikunarstól úr Bræðratungu, og tveimur altaristöflum sem leiddi hana á óvæntar brautir.
Ólöf Gerður Sigfúsdóttir, mannfræðingur og forstöðukona rannsóknarþjónustu Listaháskóla Íslands, kynnti þá þróun sem orðið hefði í listrannsóknum innan evrópskra háskóla, og hvernig listrannsóknir sem myndlistarmenn stunda greina sig að frá listfræðarannsóknum sem fræðimenn stunda.

Listfræðafélagið heldur opið málþing í Nýlistasafninu við Skúlagötu 28, þriðjudaginn 30. mars. Málþingið hefst kl. 17.00 og stendur  til kl. 19.00.

Veigamikill þáttur í starfi þeirra sem skrifa um myndlist er að fjalla um verk listamanna og sýningar í samtíðinni, að segja frá og greina myndlistina um leið og hún kemur fyrst fyrir almenningssjónir. Undir það starf falla textar í sýningarskrám og umfjöllun í tímaritum, dagblöðum, útvarpi og öðrum fjölmiðlum. Þetta er viðfangsefni annars málþingsins í málþingaröð Listfræðafélagsins nú í vor og hefur það fengið yfirskriftina Á mörkum listfræða og myndlistar: Túlkun myndlistar á líðandi stundu.

Í skrifum listfræðinga og gagnrýnenda í sýningarskrám og fjölmiðlum felst samræða við lesendur og listamenn um það sem listamenn, gallerí og söfn láta frá sér á hverjum tíma. Þar er ekki hægt að byggja á viðbrögðum listaheimsins eða því hvernig verkin fá á sig merkingu og skýrast í sögulegu samhengi en þó er það einmitt tilgangur skrifanna að greina merkingu verkanna, túlka þau og setja í samhengi við bæði söguna og líðandi stund. Þeir sem leggja slík skrif fyrir sig taka þannig nokkra áhættu líkt og listamennirnir sjálfir þegar þeir láta frá sér ný verk: Textinn þarf að miðla tilgangi og inntaki verkanna en jafnframt að meta nýmæli og gildi þeirra fyrir myndlistina og menninguna í víðara samhengi. Hvort sem um er að ræða gagnrýni eins og í dagblöðum eða ítarlegri greiningu eins og í sýningarskrám vakna af slíkum skrifum ýmsar áhugaverðar spurningar um samband fræða og listar, ábyrgð höfundar gagnvart listamönnum og lesendum sínum og aðferðirnar sem beita þarf til að túlka listaverk í samtímanum.

Frummælendur á þessu málþingi verða:
Jón Proppé, listheimspekingur og gagnrýnandi
Margrét Elísabet Guðmundsdóttir, fagurfræðingur og gagnrýnandi
Ólafur Gíslason, listfræðingur og gagnrýnandi
Oddný Eir Ævarsdóttir, safnaheimspekingur og rithöfundur
Þóra Þórisdóttir, myndlistarkona og gagnrýnandi.

Nýlistasafnið er samstarfsaðili Listfræðafélagsins að þessu sinni, ásamt Kynningarmiðstöð íslenskrar myndlistar.

Málþing um listfræðirannsóknir verður haldið miðvikudaginn 17. mars milli 17 og 19 í Listasafni Íslands.

Hér með er áberandi að vefur Listfræðifélags Íslands er kominn upp.