Greinasafn fyrir flokkinn: Félagsfundir

Félagsfundur — Ólafur Gíslason um séra Tómas Sæmundsson

Nú á miðvikudag, þann 3. desember 2014 kl. 17 fer fram félagsfundur Listfræðafélagsins á efri hæðinni á Kaffi Sólon, á horni Bankastrætis og Ingólfsstrætis.

Á fundinum mun Ólafur Gíslason listfræðingur spjalla um það umhverfi sem séra Tómas Sæmundsson, prófastur og Fjölnismaður, er sprottinn úr og hvernig hann skynjaði umhverfið á heimsreisu sinni í ljósi þess.

Spjall Ólafs byggir að nokkru á efni greinar hans í hausthefti Skírnis frá 2012, tilraun hans til að varpa ljósi á hvernig hugmyndaheimur rómantísku stefnunnar rataði til Íslands eftir undarlegum og kannski óvæntum leiðum

Félagsfundur — MA-nemendur í HÍ: Framhaldslíf Íslensku listasögunnar

Næstkomandi miðvikudag, þann 5. nóvember kl. 17, fer annar félagsfundur Listfræðafélagsins á þessu hausti fram á efri hæðinni á Sólon, á horni Bankastrætis og Ingólfsstrætis. Efni fundarins verður sem hér segir:

  1. Framhaldslíf Íslensku listasögunnar. Við viljum hefja umræðu innan félagsins um íslensku listasöguna, stöðu hennar og framtíð. Nemendur í MA-námi í listfræði við Háskóla Íslands hafa tekið að sér að koma með kveikju að umræðunni. Þau koma til með at ræða fyrstu tvö bindi Íslenskrar listasögu frá 2011 í stuttu máli. Þar er áherslan á það hvernig hún kemur þeim fyrir sjónir, með áherslu á kosti hennar og gallar fyrir íslenskt listfræðasamfélag í framtíðinn. Eftir „kveikju“ nemendanna verður almennt spjall á meðal fundargesta um þessi málefni. Ef vel tekst til verður síðar efnt til sérstakrar umræðu um síðari bindi sögunnar.
  2. Inntaka nýrra félaga. Nokkrir hafa sótt um aðild að félaginu undanfarið og nú þarf að bera aðild þeirra formlega upp fyrir félagsfund.

Félagsfundur — Margrét Elísabet Ólafsdóttir um sögu vídeólistar á Íslandi

Félagsfundur að loknum aðalfundi SÍM-húsinu við Hafnarstræti laugardaginn 29. mars frá 16 til 17. Margrét Elísabet Ólafsdóttir er frummælandi og flytur félagsmönnum erindi undir titlinum: Hvernig á að segja sögu vídeólistar á Íslandi ?
Í erindinu tekur hún fyrir spurningar um listfræðileg málefni, tengsl söfnunar, skráningar, söguritunar og fræða eins og sjá má í lýsingu sem fylgir hér á eftir.
Vonast er til þess að í kjölfarið verði líflegar umræður um málið, aðferðir og möguleika listfræðinnar til að segja sögu myndlistar á Íslandi.
Útdráttur erindis: Hvernig á að segja sögu vídeólistar á Íslandi ?

Það er auðvelt fyrir rannsakanda að lýsa því yfir að hann ætli sér að segja sögu íslenskrar vídeólistar. Það er erfiðara að ákveða hvernig nálgast á viðfangsefnið, ekki síst þegar flestir viðmælendur eru sammála um að á Íslandi hafi aldrei verið til vídeólist. Hvað merkir það ? Í þessu erindi ætla ég að gera tilraun til að svara þeirri spurningu um leið og ég fjalla um aðferðafræði rannsókna minna á íslenskri vídeólist og hvernig hún hefur mótast af aðstæðum. Ég mun segja frá upphafi verkefnisins, ástæðum þess að það var lagt til hliðar og síðan tekið upp aftur. Þá mun ég gera grein fyrir sýningunni „Íslensk vídeólist frá 1975-1990“ sem sett var upp í Listasafni Reykjavíkur Hafnarhúsinu síðastliðið haust og ræða hvernig forsendur rannsóknarinnar réðu áherslunum við uppsetningu sýningarinnar.

Félagsfundur — Gunnar Harðarson um bók sína um listheimspeki

Félagsfundur í Listfræðafélaginu á efri hæðinni á Sólon þriðjudaginn 10. desember 2013 frá 17–18.30.

Gestur fundarins verður Gunnar Harðarson sem kemur til með að ræða bók sína um listheimspeki sem kemur út á næstunni.
Um leið verður erindi hans eins konar minning um Danto og upprifjun á áhrifum hans og hugmyndum.

Vonandi ná sem flestir að mæta og taka þátt í vinalegu spjalli við aðra félagsmenn í kjölfar erindis Gunnars.

Félagsfundur — Birta Guðjónsdóttir og Markús Þór Andrésson um gjaldskrármál

Fyrsta félagsfundur á nýju ári  miðvikudaginn, 6. febrúar 2013, kl. 17 á Sólon.

Stjórn Listfræðafélagsins hefur sett af stað vinnu við gerð taxtaskrár þar sem grunnur verður lagður að viðmiðum fyrir það fjölbreytta starf sem sjálfstætt starfandi félagsmenn sinna, s.s. skrifum í sýningarskrár, fyrirlestrahald og sýningarstjórn.

Birta Guðjónsdóttir og Markús Þór Andrésson kynna þá grunnvinnu sem er í gangi og óska eftir samráði við félagsmenn á fundinum.

Félagsfundur — Kristín Dagmar Jóhannesdóttir um Sjónlistarverðlaunin

Fjórði félagsfundur félagsins í vetur verður þann 5. desember kl. 17 á efri hæðinni á Kaffi Sólon í Bankastræti.

Kristín Dagmar Jóhannesdóttir kemur til með að hefja umræðu kvöldsins með hugleiðingum um Sjónlistaverðlaunin sem veitt voru í haust og hvernig tekist hefur til við að endurvekja þennan viðburð. Í kjölfarið er stefnt að almennum umræðum á meðal félagsmanna um viðburði sem þessa og möguleika félagsmanna á því að vera með krítíska aðkomu að slíkum viðburðum, skipulagi þeirra, framkvæmd og markmiðum.

Nú er búið að halda þrjá félagsfundi í vetur og hafa þeir mælst vel á meðal félagsmanna. Þar sem fyrsti miðvikudagur í næsta mánuði verður strax eftir áramót verður dagskrá hnikað til og sá fundur er áætlaður þann 9. janúar.

Félagsfundur — Halldór Björn Runólfsson um Documenta 13

Þriðji félagsfundur félagsins í vetur verður þann 7. nóvember kl. 17 á efri hæðinni á Kaffi Sólon í Bankastræti.

Umræðuefni undarins verður þrettánda Documenta sýningin sem var haldin í Kassel í Þýskalandi í sumar. Halldór Björn Runólfsson safnstjóri Listasafns Íslands verður með framsögu og kynnir sýn sína af sýningunni. Í kjölfar innleggs Halldórs Bjarnar er þess að vænta að fjörugar umræður skapist um upplifun manna af sýningunni og forsendur hennar.

Nú er búið að halda tvo félagsfundi í vetur og hafa í hvort skiptið mætt á milli 10 til 20 manns. Þetta heur reynst áhugaverður vettvangur samskipta og verður það vonandi áfram.

Stefnt er að því að halda áfram með félagsfundina í vetur. Þeir verða fyrsta miðvikudag í hverjum mánuði ef því verður komið við.

Næsti viðburður á dagskrá félagsins verður opið málþing á vegum félagsins um miðlun og móttöku umræðu um samtímalist á Íslandi. Málþingið verður haldið laugardaginn 24. nóvembrer frá 13 til 15. Það kemur til með að fara fram í fjölnotasal Hafnarhússins í samstarfi við Listasafn Reykjavíkur. Þar koma Harpa Þórsdóttir, Hlynur Helgason, og Markús Þór Andrésson til með að flytja krítísk erindi um álit sína á þessum málum hér á landi. Við komum til með að kynna málþingið betur á félagsfundinum og ræða forsendur þess.

Félagsfundur — Hlynur Helgason kynnir doktorsritgerð sína

Til stóð að Kristín Dagmar væri með upphafsinnlegg um Sjónmenningaverðlaun og mögulega aðkomu félagsins að slíkum viðburðum. Því miður þurfum við að fresta þeirri umræðu vegna forfalla Kristínar.

Í staðinn ætlum við að fylgja ágætri tillögu Margrétar Elísabetar um að undirritaður, Hlynur Helgason, flytji erindi sem stjórnin hafði ætlað að setja á dagskrá síðar.

Erindi hans kemur til með að fjalla um rannsóknir hans á vettvangi heimspeki listmiðlunar út frá doktorsritgerð sem hann varði sumarið 2011 og er að ganga frá til útgáfu eins og stendur. Ritgerðin, sem í útgáfu ber titilinn, „The Beyond Within: “Post-Cinematic” Possibilities of Play and Action“,er í verufræðileg greining á möguleikum listar til áhrifa með vísan í valin dæmi úr myndlist og kvikmyndun.

Það er von okkar að í kjölfar innleggs Hlyns skapist ágætar umræður um málefni samtímalistar og aðferðafræði við að greina áhrif hennar og virkni.

Félagsfundur — Dagný Heiðdal kynnir orðasafn um myndlist

Kæru félagar!
Haustið nálgast og ný stjórn Listfræðafélagsins hefur lagt drög að starfi vetrarins.
Okkur þykir mikilvægt að skapa vettvang til að hittast og ræða mál tengd listfræðum og munum því halda reglulega fundi félagsmanna fyrsta miðvikudag í hverjum mánuði kl. 17–19 á 2. hæð á Kaffi Sólon í Bankastræti. Þar geta félagsmenn kynnt verkefni sem þeir eru að fást við í stuttu erindi, eða einskonar umræðuvaka. Dagný Heiðdal ríður á vaðið með því að kynna Orðasafn um myndlist miðvikudaginn 5. september 2012.
Lögð verður áhersla á að bæta heimasíðu félagsins listfraedi.is og koma þar á fót umræðuvettvangi um myndlist og auka möguleika félagsmanna til að kynna sig og rannsóknir sínar.
Í lok október er svo stefnt að því að halda opna ráðstefnu og verður sagt nánar frá henni síðar.
Samþykkt var á aðalfundi að árgjald fyrir 2012 yrði 3000 kr. Félagar með aukaaðild greiða helming af þeirri upphæð og félagsmenn sjötugir eða eldri eru gjaldfrjálsir. Greiðsluseðlar verða sendir í heimabanka félagsmanna og hvetur stjórnin félagsmenn til að greiða þá við fyrsta tækifæri til að staðfesta félagsaðild og stuðla að öflugu starfi félagsins.
Félagsmenn eru hvattir til að hafa samband við stjórnina ef þeir vilja leggja fram umræðuvaka á fundum, leggja til efni á heimasíðuna eða koma að starfi félagsins á annan hátt. Við komum vonandi til með að ná góðri umræðu um þessi málefni og fleiri eftir að umræðu um erindi Dagnýjar lýkur á miðvikudaginn.