tilkynningar
‍

Listasafn Íslands, Safnahúsið við Hverfisgötu í Reykjavík sunnudaginn 15. febrúar kl. 14.00 – 16.00

Hrafnhildur Schram var 1. febrúar síðastliðinn gerð að heiðursfélaga Listfræðafélags Íslands fyrir störf sín á sviði listfræða, sýningarstjórnunar og umfjöllunar um myndlist. Af því tilefni verður haldið málþing henni til heiðurs á vegum Listfræðafélagsins í Safnahúsinu við Hverfisgötu sunnudaginn 15. febrúar næstkomandi kl. 14.00 – 16.00. Fjölbreytt erindi verða haldin af félagsmönnum með vísunum í rannsóknir hennar og störf. Málþingið er opið öllum áhugasömum.

Hrafnhildi var veitt íslenska fálkaorðan fyrir framlag sitt til íslenskrar myndlistar árið 2016. Á starfsferli sínum hefur hún verið ötul við að miðla öðrum myndlist og listasögu í formi kennslu, sýninga, opinberra fyrirlestra og skrifa. Hún sinnti einnig stjórnunarstörfum á listasöfnum en hún var forstöðumaður Listasafns Ásgríms Jónssonar (1984–1988), deildarstjóri í Listasafni Íslands (1988–1991) og forstöðumaður Listasafns Einars Jónssonar (1991–2000). Hrafnhildur lauk fil.kand.-prófi í listasögu og þjóðháttafræði frá háskólanum í Lundi í Svíþjóð og stundaði eftir það framhaldsnám við sama skóla. Hún nam einnig ritlist við Háskóla Íslands.

Hrafnhildur varð þjóðþekkt fyrir fjölda útvarpsþátta um myndlist og á árunum 1983 til 1992 gerði hún nokkrar heimildamyndir fyrir Ríkissjónvarpið um íslenskt myndlistarfólk, m.a. Nínu Tryggvadóttur, Ásgrím Jónsson og Kjarval, ásamt Þrándi Thoroddsen kvikmyndagerðarmanni og um Svavar Guðnason ásamt Júlíönu Gottskálksdóttur. Frá upphafi aldarinnar starfaði hún sem sjálfstætt starfandi listfræðingur. Auk greinaskrifa og sýningartexta skrifaði hún nokkrar bækur um íslenska myndlist og má þar helst nefna Huldukonur í íslenskri myndlist sem kom út árið 2005 og Nína Sæmundsson 1892 - 1965: Fyrsti íslenski kvenmyndhöggvarinn, árið 2017. Í gegnum árin hefur Hrafnhildur sýningarstýrt mörgum myndlistarsýningum jafnt einka- og samsýningum. Út frá sjónarmiðum kynjafræða sem voru henni hugleikin, ber hæst sýningar hennar á Kjarvalsstöðum Listasafns Reykjavíkur, Með viljann að vopni – endurlit 1970–1980 árið 2010, Júlíana Sveinsdóttir og Ruth Smith: Tvær sterkar árið 2015 og Nína Sæmundsson, listin á hvörfum í Listasafni Íslands árið 2015. Áhugavert ævistarf Hrafnhildar hefur óneitanlega rutt brautina fyrir yngri listfræðinga og sýningargerðarfólk á sviði myndlistar.