Greinasafn fyrir flokkinn: Fréttir

Félagsfundur/samsæti Listfræðafélagsins 21. september kl. 5 e.h.

Við viljum minna á að fyrsti félagsfundur Listfræðafélagsins í haust sem jafnframt er samsæti verður miðvikudaginn 21. september á Jakobsen Lofti í Austurstræti kl. 5 e.h.

Á dagskrá verður inntaka nýrra félaga og önnur mál. Að því loknu verður haldið samsæti þar sem stefnt er að léttu spjalli um stefnuna í málefnum félagsins.

STEFNUMÓT — Spegill tímans og starfið framundan

Nú er að hefjast vetrarstarf Listfræðafélagsins. Fyrsti viðburðinn er Spegill tímans, fyrirlestur Aðalheiðar Valgeirsdóttur og Aldísar Arnardóttur sem fram fer í Safnahúsinu við Hverfisgötu í dag miðvikudaginn 7. september frá 12 til 13. Fyrirlesturinn er fyrsti fyrirlesturinn í nýrri fyrirlestraröð Listfræðafélagins í Safnahúsinu. Röðin ber yfirheitið STEFNUMÓT og í henni er áhersla lögð á sýningar sem félagar Listfræðafélagins hafa staðið fyrir á undanförnum árum og eiga það sameiginlegt að stefna saman listamönnum af ólíkum kynslóðum.

Við skorum á félagsmenn að mæta til að kynnast akoðun þeirra Aðalheiðar og Aldísar á verkum Karls Kvaran í samspili við samtímamálverk Erlu Þórarinsdóttur.

Næst á dagskrá hjá félaginu verður félagsfundur þann 21. september sem stefnt er að að eigi sér stað á Jakobsen Lofti í Austurstræti. Þar verður tekin fyrir umsókn þriggja aðila um félagsaðild en eftir það fara fram óformlegar umræður á milli félagsmanna um störf þeirra á listfræðavettvangi og möguleika í framtíðarstarfi félagsins.

STEFNUMÓT — Aðalheiður Valgeirsdóttir og Aldís Arnardóttir — Spegill tímans

Spegill tímans, fyrirlestur Aðalheiðar Valgeirsdóttur og Aldísar Arnardóttur sem fram fer í Safnahúsinu við Hverfisgötu miðvikudaginn 7. september frá 12 til 13. Fyrirlesturinn er fyrsti fyrirlesturinn í nýrri fyrirlestraröð Listfræðafélagins í Safnahúsinu. Röðin ber yfirheitið STEFNUMÓT og í henni er áhersla lögð á sýningar sem félagar Listfræðafélagins hafa staðið fyrir á undanförnum árum og eiga það sameiginlegt að stefna saman listamönnum af ólíkum kynslóðum.

Eitt af viðfangsefnum listfræðinnar er að skoða myndlistina útfrá mismunandi sjónarhornum og setja í samhengi við orðræðu og tíðaranda hvers tíma. Í fyrirlestrinum Spegill tímans, fjalla listfræðingarnir og sýningarstjórarnir Aðalheiður Valgeirsdóttir og Aldís Arnardóttir um það samtal sem verður til þegar verkum listamanna tveggja kynslóða er teflt saman, líkt og gert er á sýningunni Tímalög sem nú stendur yfir í Listasafni Árnesinga í Hveragerði. Þar eru sýnd verk eftir listamennina Karl Kvaran (1924-1989) og Erlu Þórarinsdóttur (1955). Þær Aðalheiður og Aldís munu segja frá tilurð sýningarinnar, vinnuferlinu og þeirri aðferðafræði sem liggur að baki sýningarverkefninu.

Aðalheiður Valgeirsdóttir er myndlistarmaður og sjálfstætt starfandi listfræðingur og sýningarstjóri. Hún útskrifaðist úr grafíkdeild Myndlista-og handíðaskóla Íslands árið 1982. Hún lauk BA prófi í listfræði með menningarfræði sem aukagrein frá Háskóla Íslands árið 2011 og MA prófi í sömu grein árið 2014.

Aldís Arnardóttir er sjálfstætt starfandi listfræðingur og sýningarstjóri. Hún útskrifaðist með MA gráðu í listfræði við Háskóla Íslands árið 2014 og hafði áður lokið þaðan BA prófi í listfræði, með menningarfræði sem aukagrein árið 2012.

 

 

STEFNUMÓT — Ný fyrirlestraröð Listfræðafélags Íslands í Safnahúsinu við Hverfisgötu

Síðastliðið vor stóð Listfræðafélag Íslands fyrir  hádegisfyrirlestrum í lestrarsal Safnahússins við Hverfisgötu.  Þeir mæltust vel fyrir og voru vel sóttir. Sökum þessa almenna áhuga á málefnum sem tengjast sögu og forsendum myndlistar á Íslandi hefur því verið ákveðið að halda þessu starfi áfram haustið 2016. Þema þessarar nýju raðar er STEFNUMÓT og er hér áhersla lögð á sýningar sem félagar Listfræðafélagins hafa staðið fyrir á undanförnum árum og eiga það sameiginlegt að stefna saman listamönnum af ólíkum kynslóðum. Niðurstaða þessara sýninga hefur gjarnan verið að sýna bæði sögulega þekkta listamenn og samtímalistamenn í óvæntu ljósi. Fyrsti fyrirlesturinn verður í hádeginu miðvikudaginn 7. september. Fyrirlesarar eru félagsmenn Listfræðafélags Íslands og eru allir velkomnir.

Listfræðafélag Íslands, sem stendur á bak við fyrirlestrana, var formlega stofnað í maí árið 2009 af hópi listfræðinga, sýningarstjóra og annarra fagaðila á sviði listfræða á Íslandi. Félagsmenn eru um 60. Félagið leysti af hólmi eldra félag, Félag listfræðinga, sem var stofnað árið 1984 en hætti starfsemi upp úr aldamótum. Frá upphafi hefur markmið Listfræðafélags Íslands verið að efla samvinnu þeirra sem starfa á sviði listfræða, að stuðla að listfræðirannsóknum og miðlun þeirra til almennings og að efla kennslu á sviði listfræði. Félagið skipar fulltrúa í opinberar nefndir og ráð eins og Myndlistarráð og á einnig fulltrúa í stjórn Sambands norrænna listfræðinga. Frá upphafi hefur félagið staðið fyrir reglulegum fundum félagsmanna en það hefur einnig skipulagt opinber málþing, í samstarfi við listastofnanir á höfuðborgarsvæðinu, þar sem rannsóknir á sviði listfræða hafa verið kynntar almenningi. Vorið 2015 stóð félagið að viðamikilli ráðstefnu listfræðinga á Norðurlöndum, NORDIK 2015, sem þá var haldin í fyrsta sinn í Reykjavík.

Dagskrá

7. september kl. 12–13Aðalheiður Valgeirsdóttir og Aldís Arnardóttir listfræðingar: Spegill tímans, fyrirlestur út frá sýningunni Tímalög í Listasafni Árnesinga í Hveragerði þar semverkum Karls Kvarans og Erlu Þórarinsdóttur er teflt saman.

5. október kl. 12–13 Dorothee Maria Kirch sýningarstjóri ræðir , sýninguna Uppbrot í Ásmundarsafni þar sem Elín Hansdóttir sýnir í samspili við verk Ásmundar Sveinssonar.

 

 

Sýningarlok – Brjóstdropar í Nesstofu

Ágæti viðtakandi, Komið er að síðustu sýningardögum myndlistarsýningarinnar Brjóstdropar í Nesstofu, Seltjarnarnesi, en henni lýkur þann 31. ágúst næstkomandi. Þar sýna þær Anna Jóa, Bryndís Jónsdóttir, Hildur Margrétardóttir, Hlíf Ásgrímsdóttir, Guðbjörg Lind Jónsdóttir, Kristín Geirsdóttir, Kristín Jónsdóttir frá Munkaþverá og Ólöf Oddgeirsdóttir. Sýningunni Brjóstdropar er ætlað að hverfast um hið sérstæða hús Nesstofu, sögu þess og náttúrulegt umhverfi. Yfirskrift sýningarinnar vísar í heilnæmt sjávarloftið og andrúm lækningameðala og aðhlynningar sem umlykur húsið. Þá er skírskotað til þeirrar andlegu næringar og hollustu sem sækja má til listarinnar og sýningarhópurinn – hópur kvenna – vonast til að blása öðrum í brjóst með sýningunni. Brjóstdropar er tíunda samsýning hópsins. Rekstur sýningarinnar er samstarfsverkefni Þjóðminjasafns Íslands og Seltjarnarnesbæjar. Nesstofa er opin alla daga nema mánudaga frá kl. 13-17 á sýningartímabilinu frá 3. júní til 31. ágúst 2016.

Nýjungar á vef

Félagsmenn hafa eflaust tekið eftir því undanfarið að verið er að vinna að nýjungum á vef félagsins. Allir félagsmenn hafa í þessu skyni fengið sendan aðgang að vefnum þar sem þeir geta skráð sig inn. Þessi aðgangur er hluti af því að gera vefinn virkari í starfi félagsins og öflugri í því að kynna starfsemi félagsmanna út á við. Í fyrstu verða það þessir þættir sem koma til framkvæmdar í þessu ferli:

  1. Nýjungar í tengslum við póstlista félagsins. Eftirleiðis verða fréttir til félagsmanna, sem sendar hafa verið út á póstlistann frettir@listfraedi.is, beintengdar við vefinn. Þegar þær, eins og þessi hér frétt, birtast á vefnum eru þær jafnframt sendar sjálfkrafa í vefpósti til félaga. Ef félagsmenn svara fréttapóstinum með emaili kemur svarið inn sem athugasemd við upphaflegu fréttina.
  2. Áfram geta félagsmenn sent fréttir á póstlistann með því að senda bréf á frettir@listfraedi.is. Sú frétt birtist þá sem færsla á vef félagsins auk þess sem hún er send félagsmönnum í vefpósti. Hægt er að senda mynd með fréttum í viðhengi sem birtist með fréttinni á vefnum. Æskileg stærð fréttamynda er 600 dílar á hæð og 1066 dílar á breidd (hlutfallið 1/1,6).
  3. Upplýsingar um félagsmenn til birtinar útávið. Nú fá félagsmenn aðgang að því að breyta eigin prófíl á vef félagsins og hvernig upplýsingar um þá sjálfa birtast þar. Prófíllinn birtist þegar smellt er á „FÉLAGA-UPPLÝSINGAR“ sem birtist í valmyndinni vinstra megin eftir að búið er að skrá sig inn. Með því að smella á tannhjólið ofarlega til hægri í glugganum sem birtist er hægt að breyta skráningunni. Þar er hægt, eins og á Facebook, að setja inn mynd af sjálfum sér og bakgrunns-banner-mynd. Einnig er hægt þar að setja inn texta, æskilega á íslensku og ensku, um starfssvið og feril. Einnig er í upplýsingunum svæði fyrir stikkorð um rannsóknar- eða starfsvið viðkomandi.

Ef þið lenidð í vandræðum með að skrá inn upplýsingar eða setjainn myndefni, sendið okkur þá endilega línu á listfraedi@listfraedi.is og við verðum ykkur innan handar með að setja efnið inn.

Sumarsamsæti Listfræðafélagsins Nora Magasini 15. júní

Sumarsamsæti Listfræðafélagsins verður haldið fimmtudaginn 15. júní um  kl. 17 á  Nora  Magasín í Pósthússtræti 9. Þar koma félagar til með að hittast óformlega, fásér léttar veitingar og skeggræða málefni líðandi stundar á vettvangi listfræða. Vonandi sjá sem flestir sér fært að mæta í sumarblíðu.

Gleðistundin er á milli 16 og 19.

LISTVINIR — Benedikt Hjartarson — Fyrsta almenna listasýningin 1919

Fyrsta almenna listasýningin 1919: Um Listvinafélagið og mótun íslenskrar fagurmenningar

Í ár eru liðin 100 ár frá því að Listvinafélag Íslands var stofnað í Reykjavík. Af því tilefni efnir Listfræðafélag Íslands til hádegisfyrirlestra um Listvinafélagið og efni tengd því í lestrarsal Safnahússins við Hverfisgötu, vorið 2016.
Fyrirlesarar eru félagsmenn Listfræðafélags Íslands og eru allir velkomnir.

Fjórði og síðasti fyrirlesturinn í röðinni verður haldinn miðvikudaginn 4. maí, kl. 12–13 í Safnahúsinu við Hverfisgötu.
Þar flytur Benedikt Hjartarson, prófessor í almennribókmenntafræði við Háskóla Íslands, erindi sem ber titilinn Fyrsta almenna listasýningin 1919: Um Listvinafélagið og mótun íslenskrar fagurmenningar.

Í erindinu verður fjallað um fyrstu árin í starfsemi Listvinafélagsins og leitast við að setja þau í hugmynda- og menningarsögulegt samhengi. Í forgrunni verður fyrsta almenna íslenska listasýningin árið 1919 og þær hræringar sem greina má í íslensku menningarlífi á þeim tíma. Á árunum 1919 og 1920 rata nýjar og framsæknar listhreyfingar í Evrópu, á borð við fútúrisma, dadaisma og kúbisma, af krafti inn í íslenska menningarumræðu og gegna mikilvægu hlutverki við mótun hugmyndarinnar um íslenska nútímalist. Viðbrögðin við nýstárlegri og tilraunakenndri fagurfræði umræddra hreyfinga voru blendin hér á landi, þó má greina ákveðna sátt í afstöðunni til hreyfinganna. Erindinu er ætlað að bregða upp mynd af þessari sátt og hlutverki hennar í því verkefni að siðvæða þjóðina með fagvæðingu listavettvangsins og mótun íslenskrar fagurmenningar. Í þessu tilliti verður einkum horft til skrifa Guðmundar Finnbogasonar, Sigurðar Nordals, Jóns Björnssonar og Alexanders Jóhannessonar frá árunum 1918-1920.